"Riyaan Ku Arkay Odaygii Cigaal Ina Abiiboowe….. "…Maanso Ay Isku Waraysanayaan Abwaan Guuleed Iyo Marxuum Cigaal

Riyaan ku arkay odaygii cigaal ina abiiboowe ”

Wuxuu yidhi ilaahay dartii ololahaan qaaday ”

Ummaddaan isugu yeedhayiyo beelahaa ururshay ”

Amnigaan sugiyo dawladdaan udubada u taagay ”

Kursigaan shacbiga ii igmaday ugu adeegaayay ”

Weligay ujeeddiyo dangaar eex kamaan taline ”

Ubadkayga kama biilin iyo ooryo ii dhaxaye ”

Xilalkii awooddaa lahaa ehelkay maan siine ”

Inantayda iyo wiilka qaba lama aqoonayne ”

Iskaa daa’ anfaaciyo inaan oon ka raadsado ”

Adduunkaygii baan geliyay iyo aqalladaydiiye ”

Albaab kalama hadhin maal wixii aabbahay dhaqaye ”

Waataan dalkiyo aawadii iib u faasaxaye ”

Waxa udaha la iskaga tiraa ulaha ta u dheere ”

Weligay ammaaniyo ma cunin shilin agoomeede ”

Anigoo sidii ka ahna waa la iga oofsadaye ”

Hayeeshee ixsaankii badnaa helay abaalkiiye ”

Inshaa allaahu aakhiro janaa lay agaasimaye ”

Guuleed arrimimihii dalkiyo idil ahaan geeska ”

Waxa aa ku eeddoontihin waan u oon qabaye ”

Bal ilaahay idankii warbixin iigu soo ururi ”

Waxaan idhi ishii nabaddu wey noo irmaantahaye ”

Marmarbay utini ceel afweyn naga asiibtaaye ”

Intaa kale inkaar iyo ma taal aafo godobeede ”

Dabadaa amrane daahir iyo odaygi siilaanyo ”

Labaduba itoolkooda weyna intifaaceene ”

Maantana arboow muuse wuu noo arrimiyaaye ”

Waxse loo ammaan badinayaa dawladii udube ”

Ictiraafna waan raadinaa weli alaankaase ”

Ingirisna wuu nagu sabaa alalag tiisiiye ”

Muqdishana dabkii ololay wuu oogmayaa weliye ”

Itoobiyana weys haysataa oromo loo dhiibye ”

Ismaaciilna waxa noo beddelay eerateriyaane ”

Carabtana imaaraad beryahan waan ar aragnaaye ”

Iyaguna danbaa naga urtee nama agjoogeene ”

Wixuu yidhi irdaa carabta waan kala aqaannaaye ”

Imaaraadku waa u xun iyo aayalaawaha e ”

Axdi iyo ha moodina inay oofiyaan wacade ”

Erya daallimiintoo marnaba haysku aaminina ”

Sucuudiguna aradkaa bokhrane ma laha iimaane ”

Umarada u talisaana waa qoys addoomo ahe ”

Aragtida mid ay leeyihiin ma isticmaalaane ”

Wax aan reer galbeed soo ansixin ma oggolaadaane ”

Dad yuhuudi ku adeegatoo ibira weeyaane ”

Midda kale islaamkoo dhan way ku adyadoodaane ”

Inay na irsiq gooyaanna way ku istareexaane ”

Hadba awrka dheeraynayaa lagu arooraaye ”

Ordigaan nin lagu sheegayoo aawan baa jira e ”

Waa ehelu kheyr kaa inaad ka agdhowaataane ”

Ingiriisna waa ka ugu daran oosha reer yurube ”

Aaniyo wuxuu naga qabaa boqol amaahoode ”

Afka ha idin madaddaaliyee uurka waa cadaw e”

Inuu idin aqoonsadona waa waxaan la eegayne ”

Ammuuruhu waxay kala yihiin oodo dhacameede ”

Marmarbaad ilduuf kaga tagtaa shay istaahilahe ”

Afrikay ka dhowdahay waxaa ededinaysaane ”

Ee yuudan bay taal haddaad u ashkatootaane ”

Ummadaha badh baa jira si kale loo asxaabsado e”

Haddaa igaddan sii kala xaddaan waa albaab furane ”

Nin waliba arjiga loola tago wuu akhriyayaaye ”

Shiinuhuu abaal kaan u galay wuu ogsoonyahaye ”

Idinkaa ka orod gaabiyaye ummiyuu badane ”

Markaa aammusteenbuu rag kale uubatayn galaye ”

Ismaaciilna wuu idiinku hadhay erey walaaleede ”

Muqdishaba idaacado marbbaa laga istaadhdhaaye ”

Waxa dib u abaabuli kartaan irir samaaliiye ”

Haddii adhi la joojiyo haddii la idin axan gooyo ”

Haddii jin iyo iinsiba dagaal la idinku ekeeyo ”

Haddaan unug shan soomaaliyeed laysu imanaynin ”

Ha aqbalina goor kale inaa dib u abraartaane ”

Ku adkaysta samirkiina waa ku aflaxaysaane ”

Midda kale esenemaynta iyo dhiga isaaqaynta ”

Shan ardaa xilka u qeybsadiyo adaris dheeraad ah ”

Nana yuu astaan qaran nin kale ugu atooraynin ”

Nina waxa abbaan looga dhigay iligga yuu saarin ”

Abhiyoo masuuliyad nin sida u indha dheeraada:

Odhad iyo xisaab daba dhigoo oofaha u geliya ”

Hadduu aaduyoobana xabsiga ku abbudhoo geeya ”

In awaadhka maatidu ku dhaco badiya aammiinta ”

Aafada ka timi ceel afweyn ka ergo maareeya ”

Halka nabarka eelkiisu yahay oogta ka caddeeya ”

Is ilaashadoo nacabku yuu idinku soo aarin ”

Dad aqoonle talada u xushoo edebta waayeela ”

Aayadaha diintiyo sharciga ku addimoo qaata.