Suldaan Maxamuud Axmed Sheekh oo ka mid ah Madax-dhaqameedka waa-weyn, kana mid ah Golaha Guud ee Salaadiinta Somaliland, oo Xalay Wargeyska Yool u waramayey, waxa uu sheegay in aanay waxba kala socon go’aankii habeen hore xubnaha Salaadiintu iclaamiyeen, balse ay Warbaahinta ka ogaadeen. Dhanka kale waxa Suldaanku sheegay inay ku tallo jiraan in Golaha Salaadiintu kulmo, kadibna xog-warsi la yeeshaan xubnihii Salaadiinta ahaa ee ay u xil saareen inay Madaxweynaha kasoo qaadan afti ah inuu kalsooni ku qabo Salaadiintu inay dhex-dhexaadin ka gasho khilaafka Xukuumadda iyo Golaha Toosinta.

Suldaan Maxamuud Axmed Sheekh oo ugu horeyn ka waramayey waxay kala socdaan dhawaaqii kasoo yeedhay xubno Golaha Salaadiinta ka tirsan, waxa uu yidhi; “..Weli labada qolo midkoodna saani noogu muu waramin, markaa waxaan ka sheegaa waa been..”.

Suldaanka oo sharaxayey ujeeddada iyo awoodda xubnaha Salaadiinta ah ee ku dhawaaqay in wada-hadalkii burburay, waxa hadalladkiisii ka mid ahaa; “..Qolada Golaha Toosinta annagoo Salaadiin ahaan isku dhan baanu wada hadalnay, kalsooni bayna na siiyeen oo arrinkii wey dhiibeen, marka Guddiga Salaadiinta ah waxaanu u dirnay Xukuumadda kasoo dhameeyaan in la is arko oo la wada-tashado oo la wada hadlo oo ay arrinka dhulka dhigaan, markaa waxay ahayd qolladii Salaadiintu inay annaga warka nagu soo celiyaan naguma nay soo celin, Qolladan [Golaha Toosinta] kalay leeyihiin wey na diideena goor ay wada hadleen annagu ma ogin. Annagoo isku dhan [Golaha Salaadiinta] ayey na direen, marka waxay ahayd annagoo isku dhan aanu wada hadalnaa, markaa Guddiga dhawrka Nin ah ee iska hadlay waxba kama ogin, annigu xataa war kama hayo inta hadashay Shan iyo toddoba midkay ahaayeen, laakiin Guddigii aanu dirnay toddoba iyo toban (17) bay ahayd, markaa annaga qudhayada ayaa weli war raadis ah ee illaahay waa’-san ha inoo beryo, illay waxani [dhawaaqa kooxda Salaadiinta ah] wax la filayey may ahayne arrintaa waanu ka tashanaynaa..”

yool